Venezuela é do pobo, non da oligarquía! Comunicado tras a vitoria electoral de Nicolás Maduro nas eleccións presidenciais de 2018 

Venezuela está de noraboa. As eleccións presidenciais deste 21 de Maio deitaron o resultado necesario para que continúe a se consolidar o proceso revolucionario e emancipador que comezou Hugo Chávez e que hoxe continúa con Nicolás Maduro á fronte, a pesar de todos os ataques e descalificacións lanzadas por unha oposición que decidiu non participar — co obxectivo de non evidenciar a súa derrota despois do fracaso da guerra económica, mediática e diplomática que viu protagonizando nos últimos meses — e polas potencias imperialistas que continúan sen aceptar que os pobos poidan autodeterminarse e decidir soberanamente o seu futuro.

A vitoria de Nicolás Maduro con 67,78% do voto é incontestábel. A limpeza do proceso, grazas a un poder eleitoral blindado, obxectivo e independente, tamén o é. Por iso, as acusacións deses actores — os mesmos que dirixían as guarimbas, os que deron o golpe de estado en Honduras, os que manobraron para expulsar o goberno lexítimo do Brasil, etc. — se centran agora nunha pretendida baixa participación que, porén, é ben superior a outros procesos eleitorais que foron homologados sen problemas porque ían na dirección que o capitalismo transnacional prefere, caso dos referendos constitucionais da Unión Europea, por exemplo.

Por iso, desde Mar de Lumes, como para o conxunto do movemento internacionalista galego, acudir a esta particularidade non demostra outra cousa que a frustración dese polo imperialista perante a dignidade do pobo da Venezuela. A oposición que quixo participar puido facelo; ninguén llo impediu e atinxiu 32,48% do voto. Tampouco se lle impediu á oposición fuxida, que decidiu non someterse á vontade popular como parte dunha estratexia de auto-victimización que pretende presentar a República Bolivariana de Venezuela como un estado falido que debe ser intervido desde o exterior, e que tivo a súa expresión tamén no noso país, co hostigamento por parte de opositores violentos contra aquelas persoas que acudiron a votar ao Consulado Xeral de Venezuela en Vigo ante a total pasividade da policía e das autoridades do Estado español — punta de lanza da inxerencia europea contra a revolución bolivariana. Desde Mar de Lumes, condenamos esta complicidade coa mesma intensidade que parabenizamos a vitoria revolucionaria en Venezuela.

Finalmente, esta vitoria de Nicolás Maduro non é só electoral. É tamén, e sobre todo, unha vitoria política e social que está no camiño da normalización da vida política dun país que hai só uns meses atravesaba unha vaga de violencia instigada desde o exterior por parte das elites económicas dos Estados Unidos e da Unión Europea coa clara intención de facilitar un golpe de estado ou a intervención militar estranxeira.

Agora, nun momento en que os ataques mediáticos irán incrementar a súa intensidade, é o momento de que a solidariedade internacionalista redobre os seus esforzos para contrarrestar os seus efectos. Abonda xa de mentiras, de inxerencias e de xenofobia. Avante a democracia da Venezuela e o legado bolivariano de Hugo Chávez.

Pa’lante, Venezuela!

Comité Galego de Solidariedade Internacionalista

Partilla

Share on facebook
Share on twitter
Share on telegram
Share on whatsapp
Share on email

Subscríbete ao noso boletín internacionalista