Galiza contra o ingerencismo imperialista
Em setembro rejeitamos taxativamente as tergiversadas e tendenciosas conclusons de um “informe” promovido polo Conselho de Direitos Humanos da ONU, por carecer da mais mínima credibilidade, por ser umha monumental fraude. Nestes dous meses constatamos o acertado diagnóstico e denúncia realizada.
A contundente vitória do MAS nas eleiçons na Bolívia, o multitudinário voto afirmativo para mudar a constituiçom pinochetista na consulta realizada no Chile, a crise institucional no Peru, a perda de credibilidade de Bolsonaro e a recente derrota eleitoral de Trump nos Estados Unidos tenhem contribuído para aliviar a pressom imperialista contra a Revoluçom Bolivariana.
Se os fracassos golpistas e as falhidas tentativas de intervençons militares contra o legítimo governo de Nicolás Maduro constatam os apoios populares ao processo, a guerra económica contra a Venezuela segue endurecendo-se.
O bloqueio internacional promovido polos Estados Unidos e a Uniom Europeia continua inalterável provocando estragos nas condiçons de vida do povo trabalhador venezuelano. O acaparamento, a sabotagem, as restriçons na produçom industrial e limitaçom na distribuiçom e tránsito de mercadorias, som os principais responsáveis polo desabastecimento de bens de consumo essenciais.
A iniciativa do Encontro Mundial contra o Imperialismo da Galiza, as organizaçons e forças políticas, sindicais e entidades sociais baixo assinantes, solicitamos à comunidade galega residente na Venezuela e aos emigrantes venezuelanos no nosso país, que 6 de dezembro apoiem as candidaturas chavistas e bolivarianas nas eleiçons legislativas para renovar a Assembleia Nacional.
Umha contundente vitória eleitoral chavista e bolivariana é a melhor garantia para impossibilitar que o imperialismo e os seus aliados da oligarquia local, podam reinstaurar em Caracas um governo títere ao serviço dos monopólios e as multinacionais.
O Encontro Mundial contra o Imperialismo da Galiza apela para o conjunto das forças políticas, sindicais e sociais da Galiza ativar a solidariedade internacionalista com o povo da Venezuela e a Revoluçom Bolivariana, perante as cada vez mais graves agressons políticas e diplomáticas, as ameaças de intervençom militar, a que está sendo submetida polo imperialismo.
Alertamos o povo trabalhador galego a nom deixar-se manipular pola desinformaçom, a estar alerta perante a agenda golpista que pretende deslegitimar a transparência do processo eleitoral de 6 de dezembro.
Encontro Mundial contra o Imperialismo da Galiza
A Gentalha do Pichel
Agora Galiza-Unidade Popular
Bloque Nacionalista Galego
Centro Social O Fuscalho
Confederación Intersindical Galega
Erguer Galiza
Estudantes Antifascistas
Federación Rural Galega
Fundación Moncho Reboiras
Fundaçom Artábria
Galiza Nova
Isca!
Mar de Lumes. Comité Galego de Solidariedade Internacionalista
Marcha Mundial das Mulleres – Galiza
Plataforma Antifascista Galega
Galiza, 3 de dezembro de 2020
