#GalizaVenezuela

Compostela dixo non ao golpe de Estado na Venezuela

Na tarde de hoxe, 31 de xaneiro de 2019, colectivos sociais, internacionalistas, sindicais, políticos, xuvenís e estudantís da comarca de Compostela, entre os cales Mar de Lumes, convocamos unha concentración para expresar a repulsa polo golpe de Estado que a o imperialismo, con base de operacións nos Estados Unidos e apoiado pola insaciábel oligarquía venezolana, está a levar a cabo contra o pobo da Venezuela e o seu presidente lexítimo, Nicolás Maduro. Este foi o manifesto lido neste acto:


COMPOSTELA
CONTRA O GOLPE DE ESTADO
EN VENEZUELA

Non é a primeira vez nin será a última que os imperialistas nos queren vender un burdo golpe de Estado contra un goberno lexitimamente elexido nas urnas como se fose un acto de defensa da democracia e da liberdade.

Liberdade principalmente dos grandes capitais e as grandes empresas para saquear os pobos, pasando por riba da súa soberanía e poñéndoos de xeonllos. Non é a primeira vez, nin será a última, que o goberno español (do PP ou do PSOE), representante dos grandes monopolios, acude en axuda e mesmo chega a enviar os seus exércitos a preservar esa democracia, é dicir, os intereses destes grandes capitais en calquera confín do planeta, chámese Siria, Libia ou Venezuela.

O ataque inaudito sufrido nestes días polo pobo venezolano e o seu goberno, é a continuación de varias décadas de acoso e derribo, incluíndo a guerra mediática, diplomática e comercial e tamén o bloqueo económico de millares de millóns de dólares que serve para crear unha crise da que agora se aproveitan para xustificar a intervención. Quen está detrás son as forzas máis escuras e agresivas da reacción e do grande capital internacional.

No medio da confusión planificada desde os grandes medios de comunicación que non cesan de nos intoxicar estes días ,convén lembrar brevemente que o Presidente Nicolás Maduro foi elixido nas eleccións presidenciais de Maio de 2018 con case 68% dos votos das venezolanas e venezolanos. Unhas eleccións auditadas até 18 veces e que contaron con observadores internacionais de diferentes países, e ás que unha parte da oposición (a que agora se autoproclama goberno) decidiu non concorrer, anunciando xa previamente que non recoñecería os resultados. Porén, ese sistema de votacións si foi recoñecido pola oposición cando gañou as eleccións lexislativas.
Cando nos falan de que a Asemblea Nacional non recoñece o Presidente Maduro, convén lembrar que a referida Asemblea foi declarada en desacato polo Tribunal Supremo de Xustiza, o que convirte todos os seus actos en xuridicamente nulos de pleno dereito.

Isto amosa con meridiana claridade o carácterilegal e contrario á Constitución venezonala da autoproclamación golpista de Juan Guaidó, sen tan sequera escenificar unha votación formal, así como a vulneración do dereito internacional que os Estados Unidos e os seus lacaios da OEA, o Grupo de Lima e o resto de gobernos comparsa — incluído o de Pedro Sánchez — cometen ao recoñeceren as vías golpistas como válidas. O recoñecemento de Juan Guaidó converte o goberno español en cómplice, xunto cos gobernos máis reaccionarios do mundo, incluídas as administracións Trump e Bolsonaro.

A chamada esquerda que promove a equidistancia e o diálogo cos golpistas debe abandonar toda ambigüidade e retirar todo o seu apoio a un goberno que, lonxe de resolver os grandes problemas que afectan o noso pobo, se encamiña a implicarnos nun conflito de consecuencias imprevisíbeis que pode derivar en guerra civil e (como aprendemos da experiencia) en intervención militar estranxeira. O golpe mediático contra Venezuela que están a protagonizar no noso país os monopolios da comunicación prepara a opinión pública para nos facer cómplices de futuros e gravísimos ataques.

A solución aos problemas do pobo venezolano non virá dunha intervención, como non virá do bloqueo nin dos ataques permanentes ao goberno que democraticamente escolleu. Virá, pola contra, do respeito o dereito internacional, en concreto e de maneira moi específica, ao dereito dos pobos á súa autodeterminación e a se organizaren libremente para definir o seu futuro e o seu modelo social.
Nese camiño, as organizacións populares, antiimperialistas, obreiras, sindicais e o conxunto do pobo galego temos que prestar toda a nosa solidariedade internacionalista e o noso apoio, mobilizarnos contra a posición irresponsábel e inxerencista do goberno español e da Unión Europea e proclamar, máis unha vez, que só o pobo venezolano ten dereito a elixir os seus representantes.

Fora golpismo!
Fora goberno español cómplice!
Viva a liberdade dos pobos!

Asinan:
Agora Galiza
Anova
Asociación de Amizade Galego Cubana Francisco Villamil
Bloque Nacionalista Galego
Causa Galiza
Centro Social A Gentalha do Pichel
Colectivos da Mocidade Comunista
Comunistas da Galiza – PCPE
Fronte Popular Galega
Federación Rural Galega
Confederación Intersindical Galega
Galiza Nova
Isca!
Mar de Lumes – Comité Galego de Solidariedade Internacionalista
Movemento Galego ao Socialismo
Partido Comunista do Pobo Galego
Unión do Povo Galego
Xeira